Kahuñ Kya Haal Zaahid Gulshan e Taibah Ki Nuzhat Ka
Ke Hai Khuld e Bareeñ Ch’hota’ Sa Tukr’a Meri Jannat Ka

Ta’aal-Allah Shaukat Tere Naam e Paak Ki Aaqa
Ke Ab Tak ‘Arsh e Aa’la Ko Hai Sakta Teri Haybat Ka

Wakeel Apna Kiya Hai Ahmad e Mukhtar Ko Maiñ Ne
Na Kyuñ-Kar Phir Rihaayi Meri, Mansha Ho Adaalat Ka

Bulaate Haiñ Usi Ko Jis Ki Bigr’i Wo Banaate Haiñ
Kamar Bandhna Dayaar e Taibah Ko Khulna Hai Qismat Ka

Khuleñ Islam Ki Aankheñ Huwa Saara Jahaañ Roshan
Arab Ke Chaand Sadqe Kya Hee Kehna Teri Tal’at Ka

Na Kar Ruswa e Mahshar, Waasta Mahboob Ka Ya Rab’b
Ye Mujrim Door Se Aaya Hai Sun Kar Naam Rahmat Ka

Muraadeñ Maangne Se Pehle Milti Haiñ Madina Meiñ
Hujoom e Jood Ne Roka Hai Bar’hna Dast e Haajat Ka

Shab e Asra Tere Jalwoñ Ne Kuch Aisa Samaañ Baandha
Ke Ab Tak Arsh e A’zam Muntazir Hai Teri Rukhsat Ka

Yahaañ Ke Doobte Dam Meiñ Ud’har Jaa Kar Ub’harte Haiñ
Kinaara Aik Hai Bahr e Nadaamat Bahr e Rahmat Ka

Ghani Hai Dil, Bhara Hai Ne’mat e Kaunain Se Daaman
Gada Huñ Maiñ Faqeer e Aastaan e Khud Ba-Daulat Ka

Tawaaf e Rauza e Maula Pe Na-Waaqif Bigar’te Hai
Aqeeda Awr Hee Kuch Hai Adab Daan e Muhab’bat Ka

Khizaan e Gham Se Rakna Door Mujh Ko Us Ke Sadqe Meiñ
Jo Gul Ay Baagh-Baañ Hai Itr Tere Baagh e San’at Se

Ilaahi Ba’ad e Murdan Pardahaaye Haa-il U’th Jaayeñ
Ujaala Mere Marqad Meiñ Ho Un Ki Sham’e Turbat Ka

Suna Hai Roz e Mahshar Aap Hee Ka Muñh Takeñge Sab
Yahaañ Poora Huwa Matlab Dil e Mushtaaq e Ru’yat Ka

Wujoob e Paak Baa’is Khilqat e Makhlooq Ka ‘Tehra
Tumhaari Shaan e Wahdat Se Huwa Iz’haar Kasrat Ka

Hameñ Bhi Yaad Rakhna Saakinaan e Koocha e Jaanaañ
Salaam e Shauq Pahunche Bekasaan e Dasht e Ghurbat Ka

Hasan Sarkaar e Taibah Ka Ajab Darbaar e Aali Hai
Dar e Daulat Pe Ik Mela Laga Hai Ahl e Haajat Ka