Kya Likhuñ Izz-o-Ulaa-e-Ghaus-e-Paak
Ho Nahiñ Sakti Sana-e-Ghaus-e-Paak
Shaah Kar De Chor Ko Ek Aan Meiñ
Maiñ Fida Tujh Par Ata-e-Ghaus-e-Paak
Us Ke Qadmoñ Meiñ Salaateeñ Sar Jhuka-eñ
Apne Sar Par Le Jo Pa-e-Ghaus-e-Paak
Sab Ke Phaylay Haath Us Ke Saamne
Ho Gayi Jis Par Ata-e-Ghaus-e-Paak
Ya Khuda Bahr-e-Shaheed-e-Karbala
Ho Taraq’qi Par Wila-e-Ghaus-e-Paak
Kya Ajab Ham Be-Kasoñ Ko Khwaab Meiñ
Chehra-e-Anwar Dikhaaye Ghaus-e-Paak
Qabr Se Ut’thuñ To Ay Rab’b-e-Kareem
Mera Sar Ho Awr Pa-e-Ghaus-e-Paak
Ghaus-e-Azam Haiñ Ghulaamoñ Ke Liye
Ham Bhikaari Haiñ Bara-e Ghaus-e-Paak
Kaash Ham Se Roo Siyaahoñ Ko Kabhi
Apne Rauze Par Bulaaye Ghaus-e-Paak
Kahiye Us Ko Mahr-e-Mahshar Kya Saataye
Laa Takhaf Jis Ko Sunaaye Ghaus-e-Paak
Dekhna Ham Qaadiriyoñ Par Karam
Hashr Meiñ Jis Waqt Aaye Ghaus-e-Paak
Munkir Bad-Deeñ Ko Dozakh Ho Naseeb
Qaadiri Zer-e-Liwa-e-Ghaus-e-Paak
Qaadiri Doolha Ka Daaman Hashr Meiñ
Haath Meiñ Ho Ay Khuda-e-Ghaus-e-Paak
Naaz Hai Gar Zaahidoñ Ko Zuhd Par
Ham Ko Kaafi Hai Dua-e-Ghaus-e-Paak
Naam Lewoñ Ki Taman’na Hai Yahi
Tere Dar Par Maut Aaye Ghaus-e-Paak
Poochte Kya Ho Farishto Qabr Meiñ
Mujh Ko Kehte Haiñ Gada-e-Ghaus-e-Paak
Ham Pe Barsa De Khuda Ke Waaste
Ek Bharan Abr-e-Sakha-e Ghaus-e-Paak
Khol De Lillaah Mushkil Ki Girah
Maiñ Fida Band-e- Qaba-e-Ghaus-e-Paak
Kis Tarah Wo Raah Bhat’keñ Dahr Meiñ
Raah-e-Haq Jis Ko Dikhaaye Ghaus-e-Paak
Kyuñ Na Ho Mahboob-e-Subhani Laqab
Hai Pasand-e-Haq Ada-e-Ghaus-e-Paak
Us Raza Ka Hai JAMEEL-E-QAADIRI
Hai Raza Jis Ki Raza-e-Ghaus-e-Paak