Khuda Ke Pyare Nabi Ke Dilbar Hussain Tum Par Salam Har Dum
Shaheed E Aazam Ae Ibne Haidar Hussain Tum Par Salam Har Dum

Chiraag E Zahra Shaqeeq E Shabbar Hussain Tum Par Salam Har Dum
Imam E Aali Maqam Sarwar Hussain Tum Par Salam Har Dum

Bachai Ummat Kata Diya Sar Hussain Tum Par Salam Har Dum
Jilaya Islam Khoon De Kar Hussain Tum Par Salam Har Dum

Kiya Hei Tumne Ye Deen Zinda Bachaya Eimaan Bhi Hamara
Tumhare Ehsaan Har Kisi Par Hussain Tum Par Salam Har Dum

Zameen Saari Falak Bhi Sara Jahan Sara Gada Tumhara
Tumhare Taalib Hein Sab Samundar Hussain Tum Par Salam Har Dum

Rasool Farmaaein Jinki Khatir Hussain Mujse Hussain Se Mein
Salam Ibne Habeebe Daawar Hussain Tum Par Salam Har Dum

Sabhi Nabi Ke Salam Tum Par Firishtein Bhejein Salam Tum Par
Khuda Ke Barse Salam Tum Par Hussain Tum Par Salam Har Dum

Sabhi Sahabi Ke Ladle Tum Sitare Ho Ahle Bait Ke Tum
Hei Dast E Qudrat Tumhare Sar Par Hussain Tum Par Salam Har Dum

Shaha Ke Bachpan Ka Pyara Manzar Sawari Bante Jahan Ke Sarwar
Nawase Hote Sawaar Unpar Hussain Tum Par Salam Har Dum

Khuda Ne Bakhshi Hei Aisi Qudrat Ghulamo Pe Hei Tumhari Rahmat
Salam Ae Bekaso Ke Yavar Hussain Tum Par Salam Har Dum

Hei Unki Chaukhat Ki Ye Haqeeqat Jhukae Khud Sar Waha Sakhawat
Nisaar Jaaun Mein Aise Dar Par Hussain Tum Par Salam Har Dum

Jidhar Se Khata Ho Sara Aalam Khilate Jisme Hon Ghaus E Aazam
Hei Mere Aaqa Tumhara Vo Dar Hussain Tum Par Salam Har Dum

Tumhare Qadmo Ki Ye Karamat Bane Jo Taaj E Sare Wilayat
Wali Ho Aise Ke Ho Wali Gar Hussain Tum Par Salam Har Dum

Ye Shaan Unke Gharane Ki Hei Ye Shan Har Ek Bache Ki Hei
Ke Taaj Wale Hein Unke Naukar Hussain Tum Par Salam Har Dum

Lutake Ghar Baar Apna Sara Khuda Ko Raazi Kiya Hei Tumne
Nibhaya Waada Shaheed Ho Kar Hussain Tum Par Salam Har Dum

Gharana Sara Hei Noor Wala Jahan Mein Phaila Ujala Unka
Ye Sara Aalam Hua Munawwar Hussain Tum Par Salam Har Dum

Salam Jumla Shaheedon Par Ho Salam Unke Ghulamo Par Ho
Salam Ho Ahle Qaafile Par Hussain Tum Par Salam Har Dum

Nigah Daali Karam Ki Shah Ne Ke Janib E Haq The Hur Yu Laute
Salam Unke Wo Lautne Par Hussain Tum Par Salam Har Dum

Rafeeq E Maula Wali E Maula Hein Jaan Se Badh Ke Tumko Maula
Salam Pyare Habeeb Tum Par Hussain Tum Par Salam Har Dum

Salam Ho Jumla Baanuon Par Salam Tum Par Ho Bint E Shabbir
Salam Tum Par Ho Binte Haidar Hussain Tum Par Salam Har Dum

Salam Tum Par Imam E Sajjad Salam Tum Pe Ho Gaazi Abbas
Salam Akbar Salam Asgar Hussain Tum Par Salam Har Dum

Nabi Ke Waris Ho Ilm Mein Tum Ali Ki Manind Fahm Mein Tum
Salam Tum Par Imam E Baqir Hussain Tum Par Salam Har Dum

Nawase Siddiq Ke Ho Pyare Ho Mere Sadiq Ali Ke Pote
Salam Tum Par Imam E Jafar Hussain Tum Par Salam Har Dum

Karam Ka Darya Sakha Ke Qasim Salam Tum Par Imam E Kazim
Salam Hazrat Ali Raza Par Hussain Tum Par Salam Har Dum

Husainiyat Se Hei Deen Zinda Hussain Deen Hein Hussain Eimaan
Durud Har Dum Hussain Tum Par Hussain Tum Par Salam Har Dum

Dukhaya Qalb E Nabi Unhone Ki Zulm Ki Intehaa Jinhone
Hei Haq Ka Dushman Yazeedi Lashkar Hussain Tum Par Salam Har Dum

Uthega Ruswa Baroze Mahshar Saqar He Beshak Tera Muqaddar
Hei Sabki Lanat Yazeed Tujh Par Hussain Tum Par Salam Har Dum

Tumhari Ulfat Ki Boo Se Mahke Tumhari Chahat Ke Rang Mein Range
Ye Ibne Adam Bane Vo Khushtar Hussain Tum Par Salam Har Dum

Huzur E Rauza Tumhare Dar Par Salam Pohche Qaseedah Ban Kar
Ye Keh Raha Ehtesham E Muztar Hussain Tum Par Salam Har Dum