Hamaare Qaaid-o-Rahbar Husain Zinda Hain
Rasool-e-Paak Ke Mazhar Husain Zinda Hain

Nabi Ke Deen Ki Khaatir Shaheed Ho Kar Bhi
Har Ek Sunni Ke Andar Husain Zinda Hain

Dare Wo Jin Ka Jahaan Main Nahi Koi Haami
Husainiyon Ko Ho Kyun Dar Husain Zinda Hain

Tumhara Takht-e-hukoomat Abhi Palat Denge
Yazeediyo! Na Karo Shar Husain Zinda Hain

Jinaan Main Qaasim-o-abbas Sair Karte Hain
Wahin Pe Akbar-o-Asgar Husain Zinda Hain

Shaheedon Ko Kabhi Murda Gumaan Na Karna
Khuda Bhi Kehta Hai Yaksar Husain Zinda Hain

Unhen Jo Murda Samajhte Hain Wo Kare Maatam
Mera Aqeeda Hai Dilbar Husain Zinda Hain

Lagaaya Gaus-o-Raza, Khwaja Ne Yahi Naara
Hamare Maula-o-sarwar Husain Zinda Hain

Abhi To Baaqi Hai Karbal Ka Aakhri Maidan
Bata Do Kufr Ko Jaa Kar Husain Zinda Hain

Yazeed-e-waqt Ka Dil Kaanp Jaye Dehshat Se
Aye Sunniyo! Kaho Mil Kar Husain Zinda Hain

Zameen-e-karb-o-bala Keh Rahi Hai Kya Tujh Se
Sun, Aye Yazeed Ke Lashkar Husain Zinda Hain

Isi Se Jaan Lo Hai Kaun Faateh-e-karbal
Yazeed Mar Gaya Hai Par Husain Zinda Hain

Mata-e-ishq Ki Khairat Mang Lo, Ayyub
Saraapa Ishq Ke Paikar Husain Zinda Hain