He Kalaam e Ilaahi Me Shams o Duha
Tere Chehra e Noor Faza Ki Qasam
Qasam e Shab e Taar Me Raaz Ye Tha
Ke Habeeb Ki Zulf e Dotaa Ki Qasam

Tere Khulq Ko Haq Ne Azeem Kaha
Teri Khalq Ko Haq Ne Jameel Kiya
Koi Tujh Sa Huwa Hai Na Hoga Shaha
Tere Khaaliq e Husn o Ada Ki Qasam

Wo Khuda Ne Hai Martaba Tujh Ko Diya
Na Kisi Ko Milay Na Kisi Ko Mila
Ke Kalaam e Majeed Ne Khaai Shaha
Tere Shahr o Kalaam o Baqa Ki Qasam

Tera Masnad e Naaz Hai Arsh Bareeñ
Tera Mahram e Raaz Hai Rooh e Ameeñ
Tu Hee Sarwar e Har Do Jahaañ Hai Shaha
Tera Misl Nahiñ Hai Khuda Ki Qasam

Yahi Arz Hai Khaaliq e Arz e Samaa
Wo Rasool Haiñ Tere Me Banda Tera
Mujhe Unke Jawaar Me De Wo Jagah
Ke Hai Khuld Ko Jis Ki Safa Ki Qasam

Tu Hee Bandoñ Pe Karta He Lutf o Ataa
He Tujhi Pe Bharosa Tujhi Se Dua
Mujhe Jalwa e Paak Rasool Dikha
Tujhe Apne Hee Izz o Ulaa Ki Qasam

Mere Gar Che Gunaah Haiñ Had Se Siwa
Magar Un Se Ummeed Hai Tujh Se Riza
Tu Rahim Hai Unka Karam He Gawaah
Wo Kareem Haiñ Teri Ataa Ki Qasam

Yahi Kehti Hai Bulbul e Baagh e Jinaañ
Ke Raza Ki Tarah Koi Sehr Bayaañ
Nahiñ Hind Me Waasif e Shaah e Huda
Mujhe Shawkhi e Tab’e Raza Ki Qasam