Ahle Imaan Ke Rahnuma Hein Ateeq
Deen E Islam Ke Peshwa Hein Ateeq

Unki Bai’at Umar, Usmaań, Haidar Karein
Jaanasheen-e Nabi Ba-khuda Hein Ateeq

Mere Haami Mere Ghamzuda Hein Ateeq
Mere Haadi Mere Muqtada Hein Ateeq

Jaan E Farooq Hein, Shaan E Usmaan Hein
Aur Mahboob E Shah Murtaza Hein Ateeq

Mere Aaqa Bhi Hein Mere Daata Bhi Hein
Mere Maalik Mere Rahnuma Hein Ateeq

Aasmaan E Huda Ke Hein Raushan Qamar
Aur Sadaqat Ka Taabań Tilaa Hein Ateeq

Baagh E Jannat Mein Hein Jalwagar Mustafa
Unke Pehlu Mein Jalwanuma Hein Ateeq

Maal O Daulat Sabhi Deeń Pe Qurbaań Kiya
Tere Ehsaan Had Se Siwa Hein Ateeq

Ghaar Mein Jaan Sarkar Par Waar Di
Jaan O Dil Se Nabi Par Fida Hein Ateeq

Is Jahaań Ke Sabhi Shah O Sultan Ke
Taaj E Sar Aapke Naqsh E Paa Hein Ateeq

Saani Asnain Fil-ghaar Yaar E Nabi
Paasbani Mein Shah Ki Sada Hein Ateeq

Shaan Teri Ghataana To Mumkin Nahi
Tere Awsaaf Had Se Siwa Hein Ateeq

Haakim E Khalq Ke Khaadim E Khaas Hein
Aur Sardar E Har Do-sara Hein Ateeq

Har Imaam O Wali Har Sahaabi Ne Bhi
Keh Diya Hei Ke Sab Se Wara Hein Ateeq

Afzal Ul-khalq Ba’ad Al-rusul Hein Wohi
Saiyid Ul-muttaqeeń Ba-safa Hein Ateeq

Har Wilayat, Sadaqat, Karamat Mein Woh
Be-nazeer Aur Sabse Wara Hein Ateeq

Dar Haqeeqat Khuda Ki Ataa Hein Ateeq
Sarwar E Anbiya Ki Raza Hein Ateeq

Sabse Afzal Hein, Pehle Khalifa Hein Woh
Afzaliyat Ki Ek Ibtida Hein Ateeq

Ibne Adam Na Dar Rifz Ki Lahr Se
Teri Kashti Ke Ek Nakhuda Hein Ateeq

Har Museebat Mein Tu Lau Laga Ehtesham
Fazl E Maula Se Mushkil Kusha Hein Ateeq