Aamina Ka Laal Aaya, Aamina Ka Laal Aaya
Aamina Ka Laal Aaya, Aamina Ka Laal
Aa Gaya Woh Noor Wala Jis Ki Unchi Shaan Hai
Jis Ki Midhat Mein Utaara Rab Ne Ye Qur’an Hai
Ho Bayan Kaise Fazilat Aamina Ke Chand Ki
Us Ki To Har Har Adaa Par Bolta Quran Hai
Jo Kaha Mere Nabi Ne Wo Hamesha Sach Hua
Hoo-Ba-Hoo Sabit Ye Karta Aaj Science-Daan Hai
Jis Ki Haibat Se Pahaadon Par Hon Taari Zalzale
Seena-e-Mahboob Par Utra Wahi Qur’an Hai
Rahmat-e-Bari Mili Hai Khub Kar Lo Ab Khushi
Rab Ka Ye Farman Hai Aur Aayat-e-Quran Hai
Sang-Reze Bol Uthte Hain Tumhaare Hukm Se
Kya Tumhara Martaba Aur Kya Tumhari Shaan Hai
Aamina! Tujh Ko Mubarak Tere Ghar Jalwa-Figan
Aaj Wo Maah-e-Risaalat Nabiyon Ka Sultan Hai
Momin-e-Kaamil Hai Wo Saahib-e-Imaan Hai
Jaan Jis Ki, Ya Nabi! Aap Par Qurbaan Hai
Waqt-e-Aamad Rab Ki Rahmat Ke Jo Hisse Waa Bate
Aaj Usi Rahmat Ka Taalib, Ya Nabi Salman Hai